អ៊ុយក្រែន៖ ប្រធានាធិបតីអ៊ុយក្រែន លោក Volodymyr Zelenskiy បានឱ្យដឹងនៅថ្ងៃពុធនេះថា កីឡាករម្ចាស់ជើងឯកទម្ងន់ធ្ងន់ពិភពលោក Oleksandr Usyk ត្រូវបានដោះលែងវិញហើយ បន្ទាប់ពីត្រូវបានឃាត់ និងឃុំខ្លួនដោយអាជ្ញាធរនៅក្នុងអាកាសយានដ្ឋានទីក្រុង Krakow ប្រទេសប៉ូឡូញ។ ថ្លែងតាមរយៈបណ្ដាញសង្គម Telegram លោក Zelenskiy បញ្ជាក់ថា៖ "ខ្ញុំមានការខឹងសម្បារជាខ្លាំងចំពោះបែបនេះមកលើពលរដ្ឋ និងកីឡាករជើងឯករបស់យើង។ មកដល់ពេលនេះ កីឡាករជើងឯករបស់យើង (Oleksandr Usyk) ត្រូវបានដោះលែងវិញហើយ និងគ្មានការឃុំខ្លួនណាមួយផ្សេងទៀតទេ"។ 

មកដល់់ពេលនេះ គេមិនទាន់ដឹងពីមូលហេតុនៃការឃុំខ្លួនកីឡាករអ៊ុយក្រែនជាម្ចាស់ជើងឯកប្រដាល់ WBC, WBO និង WBA រូបនេះឡើយ។ សូមបញ្ជាក់ថា Oleksandr Usyk ដែលធ្លាប់ជាម្ចាស់មេដាយមាសព្រឹត្តិការណ៍កីឡាអូឡាំពិក ឆ្នាំ២០១២ ត្រូវបានពលរដ្ឋអ៊ុយក្រែនចាត់ទុកជាវីរបុរសក្នុងកិច្ចខិតខំប្រឹងប្រែងគាំទ្រដល់អ៊ុយក្រែនក្នុងសង្គ្រាមជាមួយរុស្សី។ 

នៅលើបណ្ដាញសង្គម Instagram ផ្ទាល់ខ្លួន Usyk បានបង្ហោះសារយ៉ាងដូច្នេះថា៖ "អ្វីៗបានល្អប្រសើរឡើងវិញហើយ! បញ្ហាដែលកើតឡើងពីការយល់ច្រឡំត្រូវបានដោះស្រាយបញ្ចប់យ៉ាងឆាប់រហ័ស។ សូមអរគុណអ្នកគ្រប់គ្នាដែលមានការព្រួយបារម្ភ"។ សារដដែល Usyk ក៏បានបង្ហាញការគោរពចំពោះអាជ្ញាធរប៉ូឡូញចំពោះការអនុវត្តច្បាប់ប្រកបដោយប្រសិទ្ធភាពបំផុត។ 

រដ្ឋមន្រ្តីការបរទេសអ៊ុយក្រែន លោក Andrii Sybiha ថ្លែងនៅលើបណ្ដាញសង្គម X យ៉ាងដូច្នេះថា «ក្រសួងការបរទេសអ៊ុយក្រែននឹងទាក់ទងទៅក្រសួងការបរទេសប៉ូឡូញជុំវិញករណីនេះ ដោយចាត់ទុកការឃុំខ្លួននេះថាជារឿង "មិនសមហេតុផល និងមិនអាចទទួលយកបាន" ទាក់ទងនឹងកីឡាករជើងឯកដ៏ល្បីល្បាញរបស់អ៊ុយក្រែន»។

ទូរទស្សន៍ TVP Info របស់ប៉ូឡូញបានផ្សព្វផ្សាយវីដេអូប្រព័ន្ធផ្សព្វផ្សាយសង្គមនៅលើគេហទំព័ររបស់ខ្លួនដែលបង្ហាញពីមន្ត្រីអនុវត្តច្បាប់ប៉ូឡូញ វ៉ៃខ្នោះដៃលើកីឡាករ Oleksandr Usyk ឆ្លងកាត់ទីកន្លែងមួយដែលមានលក្ខណៈដូចជានៅក្នុងព្រលានយន្តហោះ។ ភរិយារបស់ Usyk ដែលបានបង្ហោះរូបថតព្រាលៗមួយសន្លឹករបស់កីឡាកររូបនេះលើ Instagram បញ្ជាក់ថា ប្តីរបស់ខ្លួនត្រូវបានដោះលែងឱ្យមានសេរីភាពវិញហើយ ក្រោយមានការយល់ច្រឡំមួយចំនួន៕